Wikimedi'Òc

Enriquesir la Wikipèdia occitana

40
4
4

Sommari

Wikipèdia es una enciclopèdia en linha participativa. Se avètz un subjècte que coneissètz plan, podètz anar crear o completar la pagina que ne parla.

↪ Accedir a Wikipèdia

Wikipèdia, a de qué servís ?

Anem pas explicar aquí l'utilitat d'una enciclopèdia. Mas en defòra de son ròtle informatiu e pedagogic, Wikipèdia a d'unas foncions annèxas que lo monde coneisson pas totjorn.

Per d'unas lengas minorizadas, Wikipèdia es sovent la basa de tèxtes liures de dreits mai larga qu'existís. Es doncas utilizada coma còrpus textual dins la bastison d'otisses coma los correctors ortografics, los clavièrs predictius, los traductors automatics...

Es tanben estada utilizada per bastir automaticament una partida de Wikidata, qu'es al jorn de uèi la sola basa de coneissenças per l'occitan.

Per mantunas rasons, dispausar d'una Wikipèdia plan provesida es doncas vital per las lengas minorizadas.

Qualas competéncias per contribuir ?

Per escriure un article sus Wikipèdia, cal solide aver un bon nivèl de lenga e de capacitats redaccionalas. Se sètz pas segur de vòstre nivèl d'occitan, podètz tanben anar redigir d'articles sus la cultura occitana dins las Wikipedia d'autras lengas per las qualas sètz mai a d'aise.

Cal tanben aver qualques competéncias en informatica, que cal utilizar de còdis per la mesa en forma del tèxte.

Cada informacion dins un article dèu èstre sorsada. Se sabètz pas redigir un article en vos basant sus de sorsas fisablas, vos val melhor o apréner abans de començar a contribuir a Wikipèdia.

Mòde d'emplec per contribuir

Etapa 1 : crear un compte

Vos cal primièr crear un compte sus Wikipèdia o vos connectar se avètz ja un compte. Se avètz creat un compte sus Wikidata, Wikiccionari, Wikimedia Commons o Wikisources, utilizaretz lo meteis per Wikipèdia.

Etapa 2 : redigir los articles

Avètz sus la pagina Wikipédia pas à pas (en francés) de tutorials vidèos per apréner a contribuir a Wikipèdia.

Trobaretz d'autras explicacions sus la pagina Débuter sur Wikipédia. Se comprenètz pas lo francés, i a de paginas coma aquelas sus las Wikipedia anglofòna, catalanofòna...

CC-BY-SA - Aure Séguier 2018 -