Wikimedi'Òc

Geolocalizar d'imatges

2
2
1

Sommari

Podètz ajustar las coordonadas e l'orientacion d'imatges de Wikimedia Commons que representan de luòcs. Los imatges geolocalizats seràn ajustats a OpenStreetMap.

↪ Accedir a Commons

Wikimedia Commons, a de qué servís ?

Una banca d'imatges, es primièr l'endreit ont se van servir totes los jornalistas que vòlon parlar d'una tematica, mas qu'an pas de fotografia per l'illustrar. Es per aquò qu'es fòrça important que las tematicas ligadas a la cultura occitana i sián presentas.

Mas los imatges de Wikimedia Commons pòdon tanben servir a de particulars que vòlon illustrar una plaqueta, un desplegant, un libre... Per exemple, lo site BaRuLa, que prepausa una mapa interactiva dels lòcs remarquables en occitan, utiliza d'unas fòtos de Wikimedia Commons.

Los imatges de Wikimedia Commons, quand son geolocalizats, pòdon èstre utilizats de mantun biais per enriquesir de mapas liuras de dreits, o per far mai interactivas de categorias de Wikimedia Commons.

Qualas competéncias per geolocalizar ?

Per geolocalizar d'imatges, vos cal èstre a d'aise dins l'utilizacion d'una mapa en linha.

Vos cal conéisser lo parçan que geolocalizatz o saber utilizar la vista 3D de Google Maps.

Mòde d'emplec per geolocalizar

Etapa 1 : crear un compte

Vos cal primièr crear un compte sus Wikimedia Commons o vos connectar se avètz ja un compte. Se avètz creat un compte sus Wikipèdia, Wikiccionari, Wikisources o Wikidata, utilizaretz lo meteis per Wikimedia Commons.

Etapa 2 : trobar un imatge de geolocalizar

Los imatges de geolocalizar son los que representan un luòc. Per ne trobar, podètz cercar de categorias que representan una comuna en picant « Category: » seguit del nom de la comuna dins lo camp de recèrca de Wikimedia Commons. Podètz tanben navigar de jos-categoria en jos-categoria a partir de las comunas de França per departament.

Quand sètz sus la pagina d'un fichièr, gaitatz dins lo blòc « Descripcion » se i a un camp « Luòc de la presa de vista ». Se i es pas, podètz geolocalizar l'imatge.

Etapa 3 : trobar las coordenadas

Vos cal primièr trobar las coordenadas aproximativas dempuèi las qualas l'imatge es estat pres. Podètz per aquò far utilizar OpenStreetMap se coneissètz lo parçan. Si que non, val melhor utilizar Google Maps que permet una vista 3D de las carrièras.

Picatz lo nom de la comuna mai pròcha del luòc de geolocalizar dins lo camp de recèrca. Puèi desplaçar la mapa fins a çò que lo luòc de la presa de vista siá al centre./p>

Quand lo site vos aficha lo luòc desirat, podètz trobar sas coordenadas dins l'url. Dins OpenStreetMap, la latitud e la longitud (en gras dins los exemples seguents) se tròban dins d'url coma https://www.openstreetmap.org/search?query=pau#map=12/43.3219/-0.3434&layers=N. Dins Google Maps, avetz d'url coma https://www.google.fr/maps/place/64000+Pau/@43.3218841,-0.4136976,12z/data=!3m1!4b1!4m5!3m4!1s0xd564885b45c7ae9:0x4066517481394b0!8m2!3d43.2951!4d-0.370797.

Vos cal puèi trobar la direccion dins la quala l'imatge es estat pres. Sus Google Maps, quand clicatz sus un punt d'una carrièra, un blòc amb una fòto apareis en bas de la mapa. Se i clicatz dessús, accediretz a la vista 3D de la carrièra. Podètz far virar lo paisatge fins a retrobar lo punt de vista de l'imatge. Lo bonòme dins lo quadre en bas a esquèrra vos indica la direccion de l'agach pendent la prisa de vista.

Etapa 4 : retrobar lo luòc sul Geolocator

Anatz sul site Geolocator. Picatz la latitud e la longitud dins lo camp de recèrca puèi clicatz sus « Apply ». La mapa a dreita aficharà mai o mens a l'endreit de la prisa de vista.

Navigatz sus la mapa fins a trobar l'endreit exacte de la prisa de vista. Quand l'avètz trobat, apuejatz sus la tòca Ctrl e clicatz sus la mapa a l'endreit desirat.

Apuejatz sus la tòca Shift. Veiretz qu'un trait apareis, que partís de l'endreit de la prisa de vista. Aquel trait correspond a la direccion de l'agach pendent la prisa de vista. Daissatz la tòca Shift apuejada e bolegatz la mirga sus la mapa per que lo trait rebate l'angle de la prisa de vista. Quand es bon, clicatz sus la mapa puèi destibatz la tòca Shift.

Etapa 5 : copiar las coordonadas

En bas del blòc d'esquèrra, lo Geolocator vos balha mantun còdi, en dejós de « Basic wikipedia/commons templates: ». Se i a pas de còdis en dejós d'aquela frasa, vos cal clicar sus « show » après la frasa.

Copiatz un dels dos còdis que començan per « {{Location| ».

Sus la pagina del fichièr de geolocalizar, clicatz sus « Modifier » a costat de « Descripcion ».

Pegatz lo còdi del Geolocator a la fin del quadre de còdi font puèi clicatz sus « Publicar las modificacions » tot en bas de la pagina.

Etapa 6 : ajustar una mapa a una categoria (opcional)

Se mantun fichièr d'una categoria son geolocalizats, podètz ajustar un ligam per veire aqueles fichièrs sus una mapa.

Sus la pagina de la categoria pertocada, clicatz sus « Modificar » en naut a dreita. Pegatz « {{Geogroup}} » a la fin del quadre de còdi font puèi clicatz sus « Publicar las modificacions » tot en bas de la pagina.

En bas de la pagina, avètz ara un quadre amb de ligams de tipe « Map of all coordinates from ... » que permeton de localizar los imatges geolocalizats sus una mapa.

CC-BY-SA - Aure Séguier 2018 -