Wikimedi'Òc

Revirar un article

15
3
5

Sommari

Wikipèdia es una enciclopèdia en linha participativa. Per enriquesir la version en occitan, podètz revirar d'articles de la version francesa o d'una autra version.

↪ Accedir a Wikipèdia

Wikipèdia, a de qué servís ?

Anem pas explicar aquí l'utilitat d'una enciclopèdia. Mas en defòra de son ròtle informatiu e pedagogic, Wikipèdia a d'unas foncions annèxas que lo monde coneisson pas totjorn.

Per d'unas lengas minorizadas, Wikipèdia es sovent la basa de tèxtes liures de dreits mai larga qu'existís. Es doncas utilizada coma còrpus textual dins la bastison d'otisses coma los correctors ortografics, los clavièrs predictius, los traductors automatics...

Es tanben estada utilizada per bastir automaticament una partida de Wikidata, qu'es al jorn de uèi la sola basa de coneissenças per l'occitan.

Per mantunas rasons, dispausar d'una Wikipèdia plan provesida es doncas vital per las lengas minorizadas.

Qualas competéncias per revirar ?

Per revirar un article sus Wikipèdia, cal solide aver un bon nivèl de lenga e de capacitats redaccionalas.

Cal tanben aver qualques competéncias en informatica, que cal utilizar d'unes botons per la mesa en forma del tèxte.

I a pas forçadament besonh d'aver de coneissenças sul subjècte de l'article, estant qu'avetz pas qu'a revirar quicòm qu'es escriut per qualqu'un mai.

Mòde d'emplec per contribuir

Etapa 1 : crear un compte

Vos cal primièr crear un compte sus Wikipèdia o vos connectar se avètz ja un compte. Se avètz creat un compte sus Wikidata, Wikiccionari, Wikimedia Commons o Wikisources, utilizaretz lo meteis per Wikipèdia.

Etapa 2 : activar l'otís de traduccion

L'otís de traduccion d'article es encara en version Bèta. Abans de l'utilizar lo primièr còp, lo vos cal activar. Dens Wikipèdia, clicatz sus « Bèta » dins lo menut en naut a dreita.

Arribatz sus una pagina que vos prepausa d'activar de foncionalitats bèta. Davalatz fins a arrivar a la foncionalitat « Traduccion de contengut ». Cochatz la casa a esquèrra de son títol.

Activar l'otís de traduccion

Clicatz sus « Enregistrar las preferéncias » en bas de la pagina.

Etapa 3 : accedir a l'otís de traduccion

En naut a dreita de la pagina, clicatz sus « Mas Conctribucions » puèi sus « Traduccions ».

Accedir a l'otís de traduccion

Etapa 4 : causir l'occitan coma lenga de l'interfàcia

Vos cal aver causit l'occitan coma lenga de l'interfàcia. Se vòstra interfàcia es pas en occitan, vos cal clicar sul nom de la lenga de l'interfàcia. Se tròba a la debuta del menut del naut e es precedit de . Dins lo camp de recèrca qu'apareis, picar « occ » puèi clicar sus « occitan » quand apareis dins la lista de las lengas en-dejós.

Etapa 5 : causir l'article de revirar

Clicatz sul boton « Novèla traduccion » en naut a esquèrra.

Una barra de recèrca se dobrís, dins la quala podètz picar lo títol d'un article de revirar. A mesura que picatz, mantun article apareis jos la barra de recèrca. Se un article existís pas en occitan, i aurà escriut en verd al-dejós « Hi manca en occitan ». Clicatz sus un article per començar de lo revirar.

Cercar un article de revirar

L'article causit apareis en plaça de la barra de recèrca. Clicatz sus « Aviar la traduccion » per començar de lo revirar. Se vos sètz enganat d'article, clicatz sus la crotz en naut a dreita per causir un autre article.

Se la recèrca d'articles se fa pas dins la lenga que volètz, podètz clicar sul nom de la lenga a dreita de la barra de recèrca. Podètz recercar una lenga en picant son nom. Mantuna proposicion de lenga vos es faita en-dejòs de çò que picatz. Clicatz sus una lenga per la causir.

Cambiar la lenga de recèrca d'article

Etapa 6 : revirar l'article

Dins l'interfàcia de traduccion, i a tres colonas. La primièra conten l'article original. La segonda conten vòstra revirada. La tresena conten los diferents otisses.

L'article original es divisit en blòcs. Per revirar un blòc, cal metre la mirga en fàcia d'aquel, dins la colona de la revirada. Un boton « Apondre una traduccion » apareisserà. Clicatz dessús.

Ajustar una traduccion

Lo paragraf de l'article original es ara copiat dins lo camp de revirada. Avètz pas pus qu'a ne modificar lo tèxte per revirar l'article.

Cal plan far atencion a escafar pas las referéncias a las sorsas d'informacion (las petitas chifras que remandan a d'obratges o de sites). D'efièit, un article pas pro sorsat pòt èstre suprimit.

Atencion tanben a doblidar pas de revirar lo títol de l'article.

Etapa 7 : metre en forma de tròces de tèxte

Se volètz metre en forma un tròç de tèxte revirat, podètz utilizar la barra de mesa en forma en naut de la tresena colona.

Barra de mesa en forma

Clicatz sus la sageta a dreita del boton Estil de tèxte per metre en gras, en italic, en expausant, en indici... Se totes los estiles apareisson pas, clicatz sus « mai » en bas del menut per los rendre visibles.

Per far un ligam de cap a una autra pagina de la Wikipèdia, seleccionatz lo tèxte sul qual far lo ligam puèi clicatz sus ligam. Un otís « Ligam » apareis dins la tresena colona. A un camp de recèrca pre-emplenat amb lo tèxte seleccionat, mas i podètz picar quicòm mai. En-dejós, vos prepausa una lista de paginas. Clicatz sus una pagina per la causir. Se la pagina amb lo tèxte qu'avètz picat existís pas encara, podètz çaquelà far lo ligam de cap a la futura pagina potenciala.

Inserir un ligam

Podètz tanben inserir un imatge en clicant sus « Supòrt » dins la barra de mesa en forma (se apareis pas, clicatz primièr suls tres punts per veire los botons suplementaris). Seguissètz puèi las instruccions de nòstra notícia « Illustrar la Wikipèdia » a partir de l'etapa 4.

Per far de mesa en forma mai avançada, podètz anar veire los tutorials vidèos de Wikipédia pas à pas o legir la pagina (en francés) Débuter sur Wikipédia

Etapa 8 : causir las categorias

Per ajustar de categorias a vòstra traduccion, podètz ensajar de trobar las que correspòndan a las categorias de l'article original. Mas existisson pas forçadament dins la Wikipèdia en occitan. En contra, la Wikipèdia occitana pòt aver de categorias qu'existisson pas dins la Wikipèdia de l'article original.

Anatz dins lo blòc « Categorias de la pagina » tot en bas de la segonda colona.

Gerir las categorias

Per cercar una categoria, picatz son títol probable dins lo camp « Apondre una categoria ». L'otís vos prepausan la o las categorias que correspòndon a çò qu'avètz picat. Clicatz sus una categoria per l'ajustar a l'article.

Se la categoria a la quala pensatz existís pas encara, picatz son nom complet. Apareisserà jos lo camp « Nòva categoria ». Clicatz dessús, serà creada automaticament e ajustada a l'article.

Causir una categoria

Etapa 9 : salvagardar la traduccion

Quand avètz acabat vòstra traduccion, la podètz publicar sus la Wikipèdia en clicant sus « Publicar » en naut de la segonda colona.

Se avètz pas acabat vòstra traduccion, mas que vos volètz interrompre, pas de problèma. Es enregistrada automaticament dins l'otís de traduccion. Quand arribatz sus la pagina d'acuèlh de l'otís de traduccion, i podètz retrobar totas vòstras traduccions en cors.

Traduccions en cors
CC-BY-SA - Aure Séguier 2018 -