Wikimedi'Òc

Completar lo Wikiccionari

10
4
4

Sommari

Lo Wikiccionari es un diccionari en linha collaboratiu. Lo podètz completar en ajustant de definicions, de traduccions, de tablèus de flexion... a un mot occitan.

↪ Accedir a Wikiccionari

Wikiccionari, a de qué servís ?

Es fòrça dificile d'aver, per quina lenga que siá, un diccionari complet e actualizat. De mots novèls son creats cada jorn e los diccionaris pòdon lèu èstre despassats. Lo numeric permet d'actualizar regularament un diccionari, e lo biais mai eficaç de recensar los mots a mesura que son creats es de far un diccionari collaboratiu. D'efièit es fòrça complicat, per una sola persona o una sola estructura, de téner actualizat un diccionari de tal biais que seguisca l'evolucion de la lenga. Es mai que mai lo cas per las lengas pauc dotadas, que mancan de mejans umans e financièrs per se consacrar a de tascas d'aquela mena.

Lo Wikiccionari permet a cadun d'enriquesir la coneissença de la lenga, en postant expressions del lor parçan, en indicant variantas qu'un autre coneisserà pas, en nuançant una definicion, en balhant sinonimes... Per una lenga coma l'occitan, es tanben un biais de rebatar melhor la diversitat dels parlars.

A mai lo Wikiccionari, coma es connectat als Wiktionary de totas las autras lengas, permet de far de ponts o de cercar de correspondéncias que se trobarián pas endacòm mai.

Qualas competéncias per contribuir ?

Per contribuir al Wikiccionari, cal plan conéisser la lenga occitana. Cal poder descriure un mot, balhar sas flexions, sas definicions, eventualament sas traduccions...

Se avètz una bona coneissença passiva de la lenga occitana, mas que vos sentissèz pas a d'aise per redigir dins aquela lenga, podètz anar descriure los mots occitans sul Wiktionnaire en francés.

Lo Wikiccionari utilisa un còdi simplificat per la mesa en forma de sos articles. Vos cal aver qualques competéncias en informatica per compréner cossí utilizar aquel còdi abans de redigir d'articles.

Lo Wikiccionari es un diccionari. Per i poder redigir d'articles, vos cal aver qualques competéncias en lexicografia (saber çò que son una accepcion o una forma flechida, conéisser plan las categorias gramaticalas...).

Mòde d'emplec per contribuir

Etapa 1 : crear un compte

Vos cal primièr crear un compte sus Wikipèdia o vos connectar se avètz ja un compte. Se avètz creat un compte sus Wikidata, Wikipèdia, Wikimedia Commons o Wikisources, utilizaretz lo meteis pel Wikiccionari.

Etapa 2 : redigir los articles

Las paginas d'ajudas del Wikiccionari son en anglés. Mas se anatz sul Wiktionnaire francés, trobaretz de fichas detalhadas qu'explican cossí contribuir. Trobaretz una pagina de benvenguda que vos presenta lo projècte e los diferents biais de contribuir. Podètz puèi legir una pagina « Premiers pas » per apréner a contribuir, e tanben las basas de la sintaxi per redigir d'articles.

Avètz, sus la pagina d'acuèlh del Wikiccionari, una mena de tablèu que vos permet de crear rapidament de paginas per de mots a partir de modèles predefinits :

Tablèu per crear rapidament de mots

Podètz tanben completar las paginas de mots qu'i mancan d'unas informacions (etimologia, accepcion, traduccions...).

CC-BY-SA - Aure Séguier 2018 -