Wikimedi'Òc

Illustrar la Wikipèdia

3
2
1

Sommari

Los articles de la Wikipèdia son fòrça mai agradius a legir se son illustrats. Podètz ajustar d'imatges a las paginas que n'an pas.

↪ Accedir a Wikipèdia

Wikipèdia, a de qué servís ?

Anem pas explicar aquí l'utilitat d'una enciclopèdia. Mas en defòra de son ròtle informatiu e pedagogic, Wikipèdia a d'unas foncions annèxas que lo monde coneisson pas totjorn.

Per d'unas lengas minorizadas, Wikipèdia es sovent la basa de tèxtes liures de dreits mai larga qu'existís. Es doncas utilizada coma còrpus textual dins la bastison d'otisses coma los correctors ortografics, los clavièrs predictius, los traductors automatics...

Es tanben estada utilizada per bastir automaticament una partida de Wikidata, qu'es al jorn de uèi la sola basa de coneissenças per l'occitan.

Per mantunas rasons, dispausar d'una Wikipèdia plan provesida es doncas vital per las lengas minorizadas.

Qualas competéncias per illustrar ?

Per illustrar un article de la Wikipèdia, cal un nivèl de lenga sufisent per compréner la tematica de l'article e causir una bona illustracion.

Per illustrar d'unes articles, pòt èstre necessari d'anar sus Wikimedia Commons recèrcar de fichièrs. Dins aqueles cases, vos calrà poder utilizar lo motor de recèrca de Wikimedia Commons e navigar al dintre de sas categorias e jos-categorias.

Mòde d'emplec per illustrar un article

Etapa 1 : crear un compte

Vos cal primièr crear un compte sus Wikipèdia o vos connectar se avètz ja un compte. Se avètz creat un compte sus Wikidata, Wikiccionari, Wikimedia Commons o Wikisources, utilizaretz lo meteis per Wikipèdia.

Etapa 2 : cercar un article a illustrar

Podètz anar veire la lista dels articles pas illustrats, mas los qu'escrivon d'articles pensan pas sovent a i recaptar los que son pas illustrar. Lo mejan mai simple de trobar los articles pas illustrats es doncas de picar sus « Una pagina a l'azard » dins lo menut d'esquèrra, fins a çò qu'arribetz sus la pagina d'un article sens imatge d'illustracion.

Etapa 3 : accedir al còdi font de l'article

Vos cal reperar l'endreit ont volètz inserir l'imatge. L'imatge inserit se metrà automaticament a dreita del tèxte dins un quadre.

Clicatz sus « Modificar » per obténer lo còdi font de la pagina. Vos cal puèi reperar, dins lo còdi, l'endreit ont volètz metre l'imatge. Posicionatz lo cursor a la debuta del paragraf en fàcia del qual l'imatge serà afichat.

Pagina « Marcelo Ríos » sus Wikipèdia
Còdi font de la pagina « Marcelo Ríos »

Etapa 4 : causir un imatge

Clicatz puèi sus « Inserir » puèi « Supòrt » dins lo menut al-dessús del còdi font.

Menut « Inserir » - « Supòrt »

Una fenèstra se dobrís, per vos ajudar a recercar un imatge sus Wikimedia Commons. Per defaut, lo camp de recèrca es emplenat pel títol de l'article Wikipèdia. Mas podètz escafar aquel tèxte per i picar un autre mot-clau o, se sabètz excactament qual imatge volètz inserir, lo nom exacte d'aquel imatge.

Fenèstra de recèrca d'imatges

Clicatz sus l'imatge que vos conven melhor, puèi sus « Utilizar aqueste imatge » en naut a dreita de la fenèstra que se dobrís.

Se capitatz pas de trobar d'imatge dins la fenèstra de recèrca, podètz dobrir Wikimedia Commons dins una autra fenèstra e cercar lo fichièr dirèctament sus aquel site. Quand avètz trobat un imatge que vos conven, vos cal copiar son nom (son nom es çò que se tròba après « File: » dins lo títol de sa pagina). Pegatz puèi aquel nom, sus Wikipèdia, dins lo camp de recèrca de la fenèstra de seleccion d'imatge.

Etapa 5 : dintrar las informacions de l'imatge

Una fenèstra se dobrís, que vos demanda d'informacions sus l'imatge. Dintratz una legenda descriptiva (un detzenat de mot maximum) e un tèxte de remplaçament (pels avugles o pels cases que l'imatge capite pas de s'afichar). Clicatz puèi sus « Inserir » en naut a dreita de la bóstia.

Dintrar las informacions de l'imatge

Etapa 6 : Enregistrar la pagina

Vos cal enfin enregistrar la pagina amb sas modificacions en clicant sus « Publicar las modificacions » al-dessús del còdi font.

Una fenèstra se dobrís, que vos demanda de documentar vòstras modificacions. Indicatz qu'avètz ajustat una illustracion, cochatz la casa « Aquò es un cambiament menor » puèi clicatz sus « Publicar las modificacions ».

Dintrar las informacions de l'imatge

Sètz tornat sus la pagina de l'article que, ara, aficha l'imatge d'illustracion.

Article illustrat
CC-BY-SA - Aure Séguier 2018 -