Wikimedi'Òc

Crear de lexèmas sus Wikidata

5
2
2

Sommari

Wikidata es una basa de coneissenças que conten de concèptes e indica lors relacions. I podètz ajustar de mots e los ligar als concèptes que representan.

↪ Accedir a Wikidata

Wikidata, a de qué servís ?

Una basa de coneissença permet a un ordenador de respondre rapidament a de questions ligadas a de donadas. Per exemple « Qualas son las ciutats mai grandas qu'an un conse qu'es una femna ? », « De qualas personas celèbras es l'aniversari uèi ? », « Quand d'enfants son nascuts en mejana en Anglatèrra aquestas 10 darrièras annadas ? », « Quals grops de musica cantan en occitan ? »...

Wikidata es una basa de coneissença que cadun pòt interrogar. Permet de far d'estatisticas, mas es tanben fòrça importanta per l'analisi de sens en tractament automatic del lengatge. Permet per exemple de bastir de servicis automatics de questions-responsas, d'analisi d'opinion a partir dels malhums socials, de resumit de tèxtes, de classificacion automatica de documents...

Demest las aplicacions que Wikidata fa possible se es plan completa en occitan, podèm imaginar, per exemple :

A mai Wikidata aurà de lexèmas e a mai aqueles lexèmas seràn ligats a de concèptes, a mai aquela mena d'otisses serà eficaça e aisida a realizar.

Qualas competéncias per ajustar de lexèmas ?

Per ajustar de lexèmas sus Wikidata, cal las competéncias seguentas :

Ajustar un lexèma e sas formas demanda pas de grandas competéncias en informatic. Mas las etapas facultativas que seguisson pòdon èstra un pauc mai malaisidas per qualqu'un qu'es pas a d'aise amb un ordenador.

Aver de coneissenças en tractament automatic del lengatge vos ajudarà fòrça a compréner l'articulacion entre totes los camps dels lexèmas. Se es mai lo costat lingüistic que vos interessa, benlèu que seretz mai a d'aise se contribuissètz sul Wikiccionari.

Mòde d'emplec per contribuir

Etapa 1 : crear un compte

Vos cal primièr crear un compte sus Wikidata o vos connectar se avètz ja un compte. Se avètz creat un compte sus Wikipèdia, Wikiccionari, Wikimedia Commons o Wikisources, utilizaretz lo meteis per Wikidata.

Etapa 2 : se connectar

Per poder revirar itèms en occitan, vos cal èstre connectat. Per vos connectar, clicatz sus « Log in » en naut a dreita del site de Wikidata.

Etapa 3 : verificar que lo lexèma existís pas ja

Per evitar de dintrar de lexèmas en doble, començatz per verificar s'existís pas ja. Per aquò far, anatz sus la pagina d'acuèlh de Wikidata. Dins lo formulari de recèrca en naut a dreita, picatz lexeme: (sens espaci abans los dos punts) seguit del mot que volètz crear.

Arribatz sus la pagina de resultats de la recèrca. Se lo mot existís ja, pas besonh de lo crear, podètz clicar dessús e passar dirèctament a l'etapa 5 o a las seguentas. Se lo mot existís pas, lo podètz crear coma indicat a l'etapa seguenta.

Etapa 4 : ajustar un novèl lexèma

Anatz a l'adreça www.wikidata.org/wiki/Special:NewLexeme.

Dintratz las informacions de basa per vòstre lexèma :

Quand avètz dintrat totas las informacions, clicatz sus « Crear ».

Etapa 5 : ajustar las formas

Vos cal primièr ajustar la forma que correspond al lèma. Clicatz sus « Ajustar una forma » dins la partida « Formas ».

Dins la bóstia que se dobrís, indicatz l'ortografia del mot dins lo camp « Representacion ». Daissatz « oc » dins la varianta d'ortografia. Las informacions de varietat e de grafia seràn indicadas endacòm mai.

Dins lo camp « caracteristicas grammaticalas », indicatz totas las caracteristicas pròprias a la forma (per oposicion a las que son generalas al lexèma, coma lo genre d'un nom) :

Quand avètz dintrat totas las informacions de la forma, clicatz sus « publicar »

Ajustar una forma

Podètz tornar far aquela manipulacion per ajustar totas las formas flexionalas que desiratz (vèrbes conjugats, feminin, plural...).

Etapa 6 : indicar l'airòl geografic d'una forma (facultatiu)

Se una forma apareis dins un airòl geografic especific de l'occitan, o podètz indicar. Clicatz sus « Ajustar una declaracion » en bas a dreita de la forma.

Dins lo camp « proprietat », picatz « localizacion geografica ». Un camp apareis a dreita, ont podètz picar la zòna correspondent a la localizacion (Lengadòc, Bearn, Marselha...). L'otís vos prepausa mantun resultat. Clicatz sul que vos conven. Quand es seleccionat, clicatz sus « publicar » a dreita del blòc de proprietat per enregistrar la localizacion.

Indicar l'airòl geografic d'una zòna

Se la forma apareis dins mantun airòl geografic, podètz tornar far aquela manipulacion en causissent una zòna diferenta a cada còp.

Etapa 7 : ajustar un sens (facultatiu)

Clicatz sus « ajustar un sens » dins la partida « Sens ». Un blòc se dobrís, que vos permet d'ajustar una descripcion del sens dins la lenga que volètz. Podètz per exemple descriure en francés lo sens d'un mot en occitan, o invèrsament.

Causissètz la lenga dins la quala faretz la descripcion en clicant dins lo camp « Lenga ». Començatz de picar la lenga desirada. L'otís vos prepausa de lengas en foncion de çò que picatz. Clicatz sus una lenga per la causir.

Ajustar un sens

Dins lo camp « Apparéncia », picatz puèi la descripcion del sens dins la lenga qu'avètz causit. Una descripcion es una frasòta corta, pas una definicion subrecompleta.

Podètz ajustar de reviradas de la descripcion dins d'autras lengas en clicant sus « Ajustar » en-dejós de la descripcion.

Ajustar de descripcions a un sens

Quand avètz ajustat totas las descripcions que volètz, clicatz sus « publicar » a dreita de l'otís.

Etapa 8 : ligar un sense a un concèpte (facultatiu)

Es una etapa fòrça importanta. Permet als ordenadors de compréner la significacion del mot, e doncas de bastir d'otisses coma l'analisi o lo resumit de tèxte, la compreneson de questions, la produccion de responsas apropriadas...

Vos cal primièr trobar l'identificant del concèpte representat pel lexèma. Per aquò far, dobrissètz un novèl onglet e anatz sus la pagina d'acuèlh de Wikidata. Dins lo formulari de recèrca en naut a dreita, picatz lo mot (o sa traduccion en francés o en anglés se en occitan i a pas de responsa). L'otís vos prepausa mantuna responsa. Clicatz sus la qu'es la bona.

Arribatz sus la pagina del concèpte. Après lo títol, i a entre parentèsis un identificant que comença per Q. Copiatz aquel identificant.

Tornatz sus la pagina d'edicion del lexèma. Cal trobar o crear (veire etapa precedenta) lo sens que correspond al concèpte. Un còp fach, clicatz sus « ajouter une déclaration » en bas a dreita d'aquel sens.

Dins lo camp « proprietat », picatz P5137 o « élément pour ce sens ». L'otís vos prepausa una responsa, clicatz dessús.

Causir la proprietat

Dins lo camp qu'es aparegut a dreita de la proprietat, pegatz l'identificant del concèpte. L'otís vos prepausa una responsa. Clicatz dessús.

Pegar l'identificant

Clicatz sus « publicar » per enregistrar lo ligam al concèpte.

Etapa 9 : ajustar de sinonimes, de traduccions... (facultatiu)

Podètz ligar un mot a un autre mot en indicant lor relacion mercés al sistèma de las declaracions. Atencion, cal que lo ligam de sinonimia, traduccion... siá fait dins lo sens del mot que correspond al de son sinonime, de sa traduccion...

Après aver creat un sens (veire etapas precedentas), clicar sus « ajouter une déclaration » en bas d'aquel sens.

Dins la bóstia que se dobrís, dins lo camp « proprietat », cercatz la proprietat que correspond a la relacion. Començatz de picar e l'otís vos fa mantuna proposicion. Clicatz sus la que representa lo ligam que volètz far.

Recercar una proprietat

Demest las proprietats mai correntas, i a : derivat de, compausat de, auxiliari verbal, lexèma omografa, es seguit de, traduccion, sinonime, antonime, troponime de, fals-amic.

Un còp la proprietat causida, vos cal trobar l'identificant del sens del mot que ciblatz. Per aquò far, dobrissètz un novèl onglet e anatz sus la pagina d'acuèlh de Wikidata. Dins lo formulari de recèrca en naut a dreita, picatz lexeme: (sens espaci abans los dos punts) seguit del mot que recercatz. Arribatz sus la paginas dels resultats. Clicatz sul mot que recercatz. Sus la pagina del mot, davalatz fins la la partida « Sens ». Se de senses son creats, an totes un identificant de tipe L seguit de numèros, un tiret, S seguit d'un numèro. Ex. : « L41768-S1 ». Vos cal copiar aquel identificant.

Tornatz sus la pagina del lexèma que sètz a editar. Dins lo camp de tèxte en fàcia de la proprietat, pegatz l'identificant. L'otís vos prepausa una responsa. Clicatz dessús.

Pegar l'identificant del mot

Clicatz sus « publicar » per enregistrar la relacion.

Etapa 10 : ajustar d'autras proprietats (facultatiu)

Podètz ajustar d'autras proprietats al lexèma, a sas formas, a sos senses... en ajustant de declaracions del biais explicat çai-sus. Podètz consultar la lista de las proprietats dels lexèmas per conéisser totas las informacions que podètz ajustar.

Se recercatz l'identificant d'un concèpte, lo picatz tal coma es dins la barra de recèrca. Se recercatz l'identificant d'un autre lexèma, cal picar lexeme: (sens espaci abans los dos punts) seguit del mot.

CC-BY-SA - Aure Séguier 2018 -