Wikimedi'Òc

Recensar qualqu'un o quicòm dins Wikidata

10
2
1

Sommari

e

Wikidata es una basa de coneissenças que conten de concèptes e indica lors relacions. I podètz recensar de personas, objèctes, tradicions en ligam amb la cultura occitana.

↪ Accedir a Wikidata

Wikidata, a de qué servís ?

Una basa de coneissença permet a un ordenador de respondre rapidament a de questions ligadas a de donadas. Per exemple « Qualas son las ciutats mai grandas qu'an un conse qu'es una femna ? », « De qualas personas celèbras es l'aniversari uèi ? », « Quand d'enfants son nascuts en mejana en Anglatèrra aquestas 10 darrièras annadas ? », « Quals grops de musica cantan en occitan ? »...

Wikidata es una basa de coneissença que cadun pòt interrogar. Permet de far d'estatisticas, mas es tanben fòrça importanta per l'analisi de sens en tractament automatic del lengatge. Permet per exemple de bastir de servicis automatics de questions-responsas, d'analisi d'opinion a partir dels malhums socials, de resumit de tèxtes, de classificacion automatica de documents...

Pòt tanben servir de basa a un fum de modules que pòdon èstre utilizats d'un biais pedagogic.

Se i recensam las personas e los concèptes ligats a la cultura occitana, se poirà bastir, per exemple :

Mas per aquò far, cal que Wikidata siá pro completa per çò que pertòca la cultura occitana.

Qualas competéncias per contribuir ?

Per crear d'itèms sus Wikidata, cal las competéncias seguentas :

Mòde d'emplec per contribuir

Etapa 1 : crear un compte

Vos cal primièr crear un compte sus Wikidata o vos connectar se avètz ja un compte. Se avètz creat un compte sus Wikipèdia, Wikiccionari, Wikimedia Commons o Wikisources, utilizaretz lo meteis per Wikidata.

Etapa 2 : se connectar

Per poder crear d'itèms, vos cal èstre connectat. Per vos connectar, clicatz sus « Log in » en naut a dreita del site de Wikidata.

Etapa 3 : causir las lengas de trabalh

A vòstra primièra connexion, vos cal causir vòstra lenga de trabalh. Clicatz sus la lenga de l'interfàcia que se tròba a la debuta del menut del naut e es precedida de . Puèi clicatz sus « afichar los paramètres » dins la bulla que se ven de dobrir.

Dins l'onglet « Afichatge », i a una opcion « Lenga d'afichatge ». Podètz ajustar de lengas de trabalh en clicant suls tres punts. Picatz puèi la debuta del nom d'una lenga, e clicatz dessús quand s'aficha dins la lista.

Podètz causir tres lengas. Çò melhor es de préner occitan, francés, anglés, que seràn las lengas mai utilizadas pels que crearàn de modules basats sus Wikidata.

Causir las lengas de trabalh

Etapa 4 : verificar se l'itèm existís pas ja

Vos cal pas crear un itèm qu'existís ja. Per saber s'existís o non, picatz son títol dins la barra de recèrca en naut a dreita. Picatz lo mot puslèu en francés o en anglés, que l'itèm pòt existir sens èstre estat revirat en occitan. Se vesètz l'itèm aparéisser dins la lista de suggestions, es qu'existís ja. Podètz clicar dessús per l'anar completar (i ajustar d'informacions, veire etapas 6 e seguentas) o crear un itèm per quicòm mai.

Etapa 5 : crear l'itèm

Per crear un itèm, clicatz sus « crear un element novèl » dins lo menut d'esquèrra. Arribatz sus la pagina per dintrar las informacions de basa sus l'itèm que volètz crear.

Causissètz la lenga dins la quala volètz dintrar las informacions e dintratz :

Quand avètz tot picat, clicatz sus « crear ».

Etapa 6 : revirar las informacions de basa

Per que lo monde pòscan trobar aisidament l'itèm, es plan d'aver sas informacions en occitan, francés e anglés (en foncion de vòstras competéncias dins aquelas lengas).

En naut de la pagina, avètz un quadre amb los labèls e las descripcions de l'itèm. Clicatz sul boton « modificar » qu'es al-dessús à dreita. Dintratz los labèls dins las autras lengas, puèi clicatz sus « publicar ».

Revirar los labèls e las descripcions

Etapa 7 : ajustar d'informacions

Cal ara ajustar d'informacions sus l'itèm. Per una persona, seràn sa profession, sa data de naissença se la sabètz, sa nacionalitat... Per un instrument de musica, la categoria que ne fa partida. Per un plat, sos ingredients...

Per saber quala mena d'informacions ajustar, çò mai simple es d'anar veire la pagina d'un itèm similar. Dobrissètz una novèla fenèstra, picatz l'adreça de Wikidata e recercatz un itèm similar dins la barra de recèrca en naut a dreita.

Per ajustar una informacion, clicatz sus « Ajustar una declaracion » en bas de la seccion « Descripcion ».

Una bóstia se dobrís amb un camp « proprietat ». Començatz de picar lo nom de la proprietat (ex. : data de naissença, natura de l'element...). Una lista de suggestions apareis en-dejós del camp. Clicatz sus la proprietat que volètz.

Avètz ara un novèl camp, per dintrar la valor de la proprietat. S'est un autre concèpte, començatz de picar son nom (ex. : instrument de musica de vent). Una lista de suggestions apareis en-dejós del camp. Clicatz sul concèpte que volètz.

S'es un site web, una data... avètz pas qu'a lo/la picar.

Quand avètz lo bon concèpte e la bona proprietat, clicatz sus « publicar ».

Repetissètz aquela operacion per ajustar totas las informacions que volètz.

Se volètz, podètz anar veire un modèle :

Causir la proprietat
Causir lo concèpte

Etapa 8 : indicar que lo concèpte es ligat a la cultura occitana

Per que los que trabalhan amb Wikidata e l'occitan pòscan utilizar l'itèm, cal indicar qu'es ligat a la cultura occitana.

Per una persona, una estructura cal ajustar l'informacion amb la proprietat « domeni d'activitat » (P101) e la valor « cultura occitana » (Q3007437).

Per un objècte o una tradicion, cal ajustar l'informacion amb la proprietat « cultura » (P2596) e la valor « cultura occitana » (Q3007437).

Per una òbra (almens en partida) en occitan, cal ajustar l'informacion amb la proprietat « lenga » (P407) e la valor « occitan » (Q14185).

Per una òbra qu'a per subjècte l'occitan, cal ajustar l'informacion amb la proprietat « subjècte o tèma màger » (P921) e la valor « occitan » (Q14185).

Se sabètz pas cossí ajustar una informacions, gaitatz a l'etapa 7.

Etapa 9 : ajustar un imatge

Es melhor que la ficha siá illustrada per un imatge. Los imatges d'illustracion devon èstre sus Wikimedia Commons.

Anatz sus Wikimedia Commons e cercatz un imatge de l'itèm que sètz a crear amb la barra de recèrca en naut a dreita. Arribatz a una pagina que lista los resultats. Clicatz sus l'imatge que pensatz la mai adaptada. Se i a pas d'imatges, ne podètz versar de las vòstras en seguissent la notícia : Versar sus Commons. Si que non, sautatz aquela etapa.

Copiatz lo nom de l'imatge (çò que i a après « File: » dins lo títol de la pagina sus la quala sètz arribat.

Tornatz sus Wikidata. Ajustatz una informacion amb la proprietat « Imatge » (P18) e per la valor, pegatz lo nom de l'imatge. Clicatz sus « Publicar ».

Se sabètz pas cossí ajustar una informacions, gaitatz a l'etapa 7.

Etapa 10 : ligar a la pagina Wikipèdia

Se ligatz l'itèm als articles Wikipèdia que li correspòndon, de bóstias d'informacions seràn automaticament ajustadas a aqueles.

Per ajustar un article Wikipèdia, clicatz sus « Modificar » a dreita del cadre « WIkipèdia » en bas de la pagina.

Vos cal primièr causir la Wikipèdia pertocada. Picatz « oc » s'es la en occitan, « fr » s'es la en francés, « en » s'es la en anglés... Una suggestion apareis en-dejós del camp. Clicatz dessús.

Picatz puèi lo títol de l'article. Una lista de suggestion apareis en-dejós del camp. Clicatz sul bon article. Se apareis pas dins la lista, probable qu'existís pas. Se lo volètz crear, podètz legir la notícia : Enriquesir Wikipèdia.

Podètz ajustar un autre article d'una autra Wikipèdia en repetissent la manipulacion dins lo camp qu'es aparegut al-dejós.

Quand avètz recensat totes los articles, clicatz sus « Publicar ».

Es fait ! Un robòt passarà lèu per ajustar la bóstia d'informacion sus Wikipèdia.

Causir la lenga de la Wikipèdia
Causir l'article

Etapa 10 : ligar a la categoria Commons

Se ligatz l'itèm a las categorias Commons que li correspòndon, de bóstias d'informacions seràn automaticament ajustadas a aqueles.

Cal primièr anar sus Wikimedia Commons per veire se la categoria existís. Picatz « Category: » e lo nom de l'itèm dins la barra de recèrca en naut a dreita. Clicatz sus la lópia per recercar. Se la categoria desirada apareis dins la lista de resultats, clicatz dessús. Si que non, probable qu'existís pas. Sautatz aquela etapa..

Copiatz lo nom de la categoria (çò que i a après « Category: » dins lo títol de la pagina sus la quala sètz arribat.

Tornatz sus Wikidata. Ajustatz una informacion amb la proprietat « Categoria Commons » (P373) e per la valor, pegatz lo nom de la categoria. Clicatz sus « Publicar ».

Se sabètz pas cossí ajustar una informacions, gaitatz a l'etapa 7.

Es fait ! Un robòt passarà lèu per ajustar la bóstia d'informacion sus Commons.

Cercar una categoria Commons
CC-BY-SA - Aure Séguier 2018 -