Wikimedi'Òc

Far un album de fòtos collaboratiu

15
3
1

Sommari

Wikimedia Commons a de categorias dins lasqualas tot lo monde pòt versar de fotografias. Vos prepausam de far un album de fòtos collaboratiu en versant de fotografias dins una d'aquelas categorias.

Poiretz puèi accedir a l'abum a l'adreça wikimedioc.com/album/nom_de_la_categoria_commons.

Aquesta activitat se fa amb l'otís Wikimedia Commons : commons.wikimedia.org

Etapa 1 : Crear un compte Commons e lo parametrar

Crear lo compte e se connectar

Se avètz ja un compte sus un autre otís de Wikimedia (Wikipèdia, Wikidata, Lingua libre...), lo podètz utilizar per vos connectar a Commons. Pas besonh de ne crear un novèl, podètz passar dirèctament a l'etapa 2.

Anatz a la pagina commons.wikimedia.org/w/index.php?title=Special:CreateAccount e seguissètz las instruccions.

Un còp qu'avètz creat vòstre compte, vos podètz connectar en clicant sul boton « se connectar » (« log in ») en naut a dreita de la pagina.

Causir la lenga de l'interfàcia

Podètz causir la lenga dins laquala s'aficharà l'interfàcia en clicant sus la lenga de l'interfàcia. Se tròba a la debuta del menut del naut e es precedida de .

Començatz de picar lo nom de la lenga que volètz e clicatz dessús dins la lista en-dejós.

Causir la lenga de l'interfàcia

Val melhor causir lo francés, que l'interfàcia en occitan es pas completament revirada, e los mots que mancan son en catalan.

Etapa 2 : Causir las categorias

Lo foncionament dels albums

Los albums fòtos d'aqueste site amassan totes los mèdias d'una categoria Commons e de sas jos-categorias (ex. : l'album de fòto Carnaval Biarnés correspond a la categoria commons.wikimedia.org/wiki/Category:Carnaval_Biarn%C3%A9s_by_year). Cada jos-partida de l'album correspond a una jos-categoria (ex. : Carnaval Biarnés 2015) o a una jos-jos-categoria (ex. : Procès de Sent Pançard - Carnaval Biarnés 2015).

Cercar una categoria

Dins la barra de recèrca en naut a dreita, picatz lo nom de la categoria que cercatz precedida de Category: (sens espacis abans los dos punts).

Se lo formulari vos prepausa mai d'una possibilitat, clicatz sus la que correspon a çò que cercatz.

Se la pagina es pas la bona, se trobatz pas çò que cercatz dins las possibilitats del formulari o se lo formulari vos prepausa pas res, escafatz lo tèxte puèi clicatz sus la lópia. Arribatz sus la pagina de recèrca de Wikimedia Commons.

Dintratz « Category: » (sens espacis abans los dos punts) e lo mot que recercatz puèi clicatz sus « Recercar ». Val melhor picar un mot en anglés, que la màger part de las categorias son pas estadas reviradas en occitan ni en francés. Auretz una lista de resultats que contenon lo mot cercat. Clicatz sus la pagina que vos interèssa.

Fotografias dins la categoria

Se la categoria que cercatz es pas dins la lista, probable qu'existís pas encara. La vos cal crear (véser çai-jos).

Cercar las jos-categorias

Anatz sus la pagina de la categoria Commons de l'album (dins nòstre exemple, commons.wikimedia.org/wiki/Category:Carnaval_Biarn%C3%A9s_by_year). Dins la seccion « jos-categorias ». Gaitatz se la categoria desirada existís. Se òc, clicatz dessús. Se l'album a de jos-jos-categorias, verificatz que la que volètz aparesca sus la pagina de la jos-categoria.

Se las jos-categorias desiradas existisson plan, notatz lor nom e passatz a l'etapa 3. Si que non, las vos cal crear.

Crear una jos-categoria

Dins lo camp de recèrca en naut a dreita, clicatz sus la lópia sens escriure res.

Camp de recèrca

Arribatz sus la pagina de recèrca. Dintratz « Category: » (sens espacis abans los dos punts) e lo nom de la categoria que volètz crear (ex. : Carnaval Biarnés 2008) puèi clicatz sus « Recercar ».

Tot en naut dels resultats, un tèxte en rotge vos prepausa de crear la categoria. Clicatz dessús.

Crear una categoria

Dins l'editor de tèxte que se dobrís, dintratz la categoria parenta amb lo còdi [[Category: Nom de la categoria]]. (Dins nòstre exemple, [[Category: Carnaval Biarnés by year]]).

Indicar la categoria parenta

Quand avètz ajustat totas las categorias parentas, clicatz sus « Publicar la pagina » en bas de la pagina.

Notatz lo nom de la categoria qu'avètz creada.

Etapa 3 : Ajustar los imatges

Se volètz mandar d'imatges de mantuna categoria (ex. : d'imatges de la caça a l'ors e d'imatges de la cremacion de Sent Pançard), vos aconselham de far dos versaments diferents per ganhar de temps.

Qualas fotografias pòdi versar ?

Cal respectar lo dreit d'autor. Las fotografias que versatz sus Commons devon èstre vòstras (o lor autor dèu èstre defuntat dempuèi almens 70 ans).

Cal tanben respectar lo dreit a l'imatge de las personas. Aquò vòl dire :

↪ Podètz pas metre en linha de fòtos d'una persona menora sens autorizacion escriuta dels parents (se lo menor vira l'esquina al fotografe, i a pas besonh d'autorizacion). Se i a besonh, podètz enfoscar una persona menora qu'es dins un rèire-plan mercés a un logicial coma Gimp.

↪ Podètz pas metre una fotografia d'una persona qu'es dins un luòc privat sens son autorizacion.

↪ Pels imatges preses dins un luòc public, las autorizacions son pas necessàrias que se la persona es isolada e se pòt reconéisser. Per un artista en representacion, normalament, i a pas besonh d'una autorizacion (mas la legislacion aquí dessús es fosca, pòt èstre plan d'aver una autorizacion orala).

↪ Se versatz una fòto d'una persona defuntada, i a pas besonh d'autorizacion, mas cal pas que l'imatge li cause prejudici.

↪ Se fotografiatz un bastiment : se son arquitectura es originala e que l'arquitècte es pas defuntat dempuèi mai de 70 ans, un dreit d'autor s'aplica (se lo bastiment es lo subjècte principal). I a una petita risca que la fotografia siá un jorn tirada de Commons.

↪ D'un biais general, evitat de postar una fotografia que pòsca portar prejudici a una persona (se se vei qu'es sadola, se a un eslip sul cap... se val melhor abstenir).

Versar mos imatges

Clicatz sus « Importar un fichièr » dins lo menut de dreita.

Clicatz sus « Seleccionatz los fichièrs multimèdias a partatjar ».

Navigatz sus vòstre ordenador fins al repertòri amb las fòtos de versar. Per seleccionar mantun fichièr que se seguisson, clicatz sul primièr, puèi apuejatz sus la tòca Shift e clicatz sul darrièr. Podètz tanben clicar sus de fichièrs en mantenent la tòca Ctrl apuejada per los ajustar a la seleccion. O podètz picar sus Ctrl e A per seleccionar totes los fichièrs d'un repertòri.

Quand totes los fichièrs son cargats, clicatz sus « Contunhar ».

Seleccionatz « Aqueles fichièrs son mon trabalh pròpi » se las fòtos son vòstras, o « Aqueles fichièrs son pas mon trabalh pròpre » se las fòtos son de fòtos del domeni public. Clicatz puèi sus « Seguent ».

Arribatz sus la pagina per dintrar las informacions suls imatges. Per cada fòto, cal dintrar :

Dintrar un títol e una legenda

En-dejós de la primièra fòto, avètz un camp « Copiar las informacions dins totes los televersaments seguents ». Dobrissètz-lo e clicatz sus « Copiar » per emplenar las informacions dels autres imatges a partir del primièr (auretz puèi pas qu'a cambiar las causas diferentas). La numerotacion s'incrementa automaticament.

Copiar las informacions suls autres imatges

Quand avètz dintrat totas las informacions, clicatz sus « Publicar los fichièrs ».

Esperatz la fin del cargament. Podètz puèi sautar l'etapa de l'ajust de declaracions en clicant sus « Sautar aquesta etapa ».

Es acabat ! Podètz ara véser vòstras fotografias dins la(s) categoria(s) que lor avètz causida(s) !

Fotografias dins la categoria

Tutorial vidèo

Aqueste tutorial es un pauc ancian, mas la màger part de las foncionalitats an pas cambiat.

CC-BY-SA - Aure Séguier 2018 -